Comimos os callos no Z9 (Salceda). Local normal, tipo tapería, servizo atento, e os callos estaban para mollar pan e non parar. A ración –cazoliña de barro a rebosar–, 5€.
Salceda de Caselas, como toda a Louriña, é terra de callos; en Salceda, a principios de setembro, celébrase a festa da exaltación dos callos; van pola XXVII edición…
Por outra banda, a tapa de callos acompañada da cunca de viño, en toda Galicia, é típica do día de feria ou mercado semanal; valen para calquera momento do día, para o almorzo, o vermú, o xantar… Normalmente á cea xa non chegan.
O mercado, en Salceda de Caselas, celébrase os mércores.
Así que o pasado mércores achegámonos a Salceda para comer uns callos. Levados por Luis, caemos na Bodeguilla Z-9, un local na mesma praza do concello (por certo, rúa do doutor Zunzunegui, avó que foi do meu irmán-amigo Magis).
Trátase dun local sen pretensións estéticas; garda toda a posible ciencia para cociñar os callos. Catalóganse como tapería e dispoñen dunha ampla carta de tapas tradicionais e algunhas importadas; prezos competitivos. Algún que outro prato de culler.
Ademais, os mércores e os domingos, os callos.
Coas imaxes xa non hai máis que dicir.
No seu punto, coas especias exactas, un mollo gordiño, os seus tropezóns de chourizo, de tripa, de pata… Deliciosos.
As racións eran abondosas e, con sobremesas para todos, auga, dúas botellas do mencía da casa e os cafés, pagamos 12 euros por cabeza.
No Z-9 ou en calquera outros dos locais de Salceda de Casela sempre pagan a pena os callos. Pero non esquezades reservar…
Bodeguilla Zeta Nove
Rúa do doutor Zunzunegui 11
36470 Salceda de Caselas (Pontevedra)
986 34 78 07
GPS: 42.102248N, 8.558386O
Cociña: tapas, tradicional
Prezo: 15€
Peche: luns