Un menú executivo en The Otilio Bar paga realmente a pena. Local moderno, divertido, actual… rabiosamente de moda. Cociña na mesma liña de singularidade e a un prezo asequible.
E non había outra. Despois da nosa recente mergulla polo que está a pasar en Vigo a nivel gastronómico (Comer en Vigo), a primeira saída tiña que ser, necesariamente, a este The Otilio Bar.
As primeiras sensacións son de nostalxia. Othilio ocupa o lugar (ampliado) no que nun tempo viviu Arantxa Costas no seu Don Chiringo, un dos meus recunchos favoritos da historia gastronómica de Vigo.
Logo, un cambio radical: barra e algunhas mesas no que era o espazo tradicional, comedor interior e ‘terraza’, ou sexa, cinco mesas pequenas directamente na rúa Luís Taboada. Ás 12 da mañá dun luns de xullo, hora na que reservamos, xa non había outra que a terraza. Non se estaba nada mal. Temperatura moi agradable, tráfico escaso (case inexistente, a rúa é peatonal) e un persoal que se esforza para que todo resulte do teu agrado.
The Othilio Bar conta cunha carta tradicional e un menú diario que chaman de ‘executivo’. Un eufemismo. Un xeito de falar do menú do día de toda a vida pero cun chisco máis de pretensións e prezo. Neste caso, entrante e prato (con dúas opcións de cada para elixir), bebida e café por 12,5€.
A carta poderiamos definila como de produtos clásicos galegos elaborados e presentados con técnicas da cociña actual.
Entrantes fríos: Carpaccio de vaca vella con aceite de trufa (10,90€), Carpaccio de polbo, mazá, alioli e parmesán (10,75€) ou Ensalada de bacallao confeitado, caviar de ourizo e oliva negra (12,5€).
Entrantes quentes: Lagostinos quentes con dip de mexillóns (10,5€), Navallas á espalda, mollo ponzu e brotes (11,5€) ou Ovo, calabizo e escuma de queixo san Simón (7,90€).
Pratos: Vieira, papada de cocho e alcachofa (13,90€), Polvo con arroz de alga codium (12,90€), Bocadillo de churrasco de cocho ibérico e parmesán (9,50€), Steak de tartar de tenreira galega (15,90€).
Comemos co menú executivo, un xeito interesante de saber o que realmente se coce nunha cociña como a deste Othilio.
Entrantes: Ensalada de uvas e parmesán con mostaza e mel,
Carpaccio de atún vermello con tarta de tomate.
b
Pratos: Pescada á portuguesa,
Guiso de xarrete e setas con arroz Pilaf
A verdade é que moi ben. Os pratos ben pensados, ben exectuados e ben presentados. Moi lonxe de menús do día tópicos e típicos polos que pagas, tal vez, un par de euros menos, pero que están a anos luz en moitos dos sentidos (que non, necesariamente, no imprescindible: comer ben cada día, fóra de casa e a bo prezo).
Os meus (o carpaccio e o xarrete) a un nivel moi, moi alto; gustáronme de verdade. Probei dos pratos de Carmen, e tamén ben; para min, mellor os meus, pero, claro, estamos ante unha cuestión de gustos persoais.
Con caña, vaso de Ribera e os cafés, o anunciado: 25€.
Está claro que para alguén que ten que comer cada día da semana fóra de casa para chegar a un soldo ridículo, tres euros arriba ou abaixo, ao longo do mes, poden chegar a ser un mundo.
Para un día, para un local co pulo que está a coller The Othilio, a comida resultou moi satisfactoria e pagamos coa sensación de que estabamos a facer un bo negocio.
The Othilio Bar
Carlos Rodal
R Luis Taboada 9
36001 (Vigo)
986 190 017
GPS: 42.239986N, 8.722994O
www.othilio.es
Facebook
Cociña: actual
Peche: domingo; luns noite.