renovar votos

Non sei se comezar pola renovación dos meus votos ao santo Valentín ou, pola contra, confirmando a miña predilección absoluta polo restaurante Ferrugem.
O caso é que aproveitando a proposta do Ferrugem, alá nos fomos Carmen e mais eu, a Famalição, a celebrar o dia dos namorados.

Restaurante Ferrugem Renato Cunha

Leo que isto dos menús na honra do santo das frechas ten moito éxito en Portugal.
Desde o celebrado Rui Paula no DOP ao máis humilde dos cantinhos na Ribera do Porto, son moitos os restaurantes que ofrecen un menú especial para este día. Os posts ao longo e ancho de Internet analizando propostas son, case, innumerables (Os 7 Melhores Restaurantes para o Dia dos Namorados em Lisboa, Os 12 Locais Mais Românticos para o Dia dos Namorados, 8 Sugestões de Hotéis para um Dia dos Namorados Perfeito, Jantar fora no Porto no dia dos namorados…)

Restaurante Ferrugem Renato Cunha

O restaurante Ferrugem está en Portela, Vila Nova de Famalição, moi cerca de ningunha parte.
É como os grandes santuarios: vas alí por fe, por algo que tira por ti desde dentro, convencido de que vai compensar, case den ollos pechados… pero sabendo que, fóra o propio santo e o feito de renderlle honras, non hai nada nos arredores próximos ou remotos que guíe a túa devoción.
Xa había máis de tres anos que non iamos por alí (Restaurante Ferrugem) e non foi difícil sucumbir ao reclamo dun menú completo dos namorados:

MENU DE DEGUSTAÇÃO S. VALENTIM 2014
(disponível de sex 14.fev a dom 16.fev)
Chefes
Dalila e Renato Cunha
Cumplicidades
Pão d’água e Manteiga de Azeite
Preliminares (snacks)
iogurte de camarão da costa (com pedaços!)
o panadinho e o molho verde, venha o polvo e escolha!
mini pastel de bacalhau com nata
chips de lombo de porco fumado
mini hambúrguer de rabo de boi com pão de batata e cebola
Viño: Quinta do Boição Arinto Reserva Bruto Bucelas DOC 2008
Primeiro ato
Bacalhau com todos (ousado!)
Viño: Afros Loureiro Vinho Verde DOC Branco 2009
Segundo ato
Lombo de porco alentejano, arroz cremoso de boletos e mini legumes em picle
Viño: Seis Quintas Martúe Reserva Douro DOC Tinto 2010
Clímax
Jardim de chocolate, framboesa e amor-perfeito
Porto Warre’s LBV 2002
café/chá/infusão e guloseima
preço: 50 € persoa

Pagou a pena. Pois claro que pagou a pena!
Vento, frío, choiva, cento vinte quilómetros á ida e outros tantos de volta… para algo máis de dúas horas de pura exaltación dos sentidos.
Materia prima, imaxinación, saber facer, tamén un especial saber estar, calidez, delicadeza, olores, texturas, sabores, tradición, sorpresa… Houbo de todo. Tanto como para renovar os meus votos de devoción polo Ferrugem e confirmar que, entre Minho e Douro, é o meu restaurante favorito.
Os viños, magnífica elección. Un destaque especial para o tinto (un Douro reserva de Moncorvo moi equilibrado, saboroso, sen aristas e disque con excepcional relación calidade-prezo) e, como non, polo Porto.
Mágoa que á saída había que loitar contra a climatoloxía, os moitos quilómetros e a razoable ameaza dos gardiñas.

Restaurante Ferrugem Renato Cunha
O pan de auga e a manteiga de aceite no seu tubo dosificador

Restaurante Ferrugem Renato Cunha
A colorista paleta cos cinco entrantes

Restaurante Ferrugem Renato CunhaO saborosísimo iogurt de lagostino e a textura do polbo empanado.

Restaurante Ferrugem Renato Cunha

A mini hamburguesa

Restaurante Ferrugem Renato Cunha
Os xa famosos e internacionais pasteis de bacallau con nata.

Restaurante Ferrugem Renato Cunha

Os chips de lombo de porco

Restaurante Ferrugem Renato Cunha
A acertada reinterpretación do bacallau con todos

Restaurante Ferrugem Renato Cunha
O lombo de porco no punto exacto co seu arroz super-cremoso de boletus

Restaurante Ferrugem Renato Cunha
O chocolate negro coas súas framboesas cristalizadas e as flores do xardín.

Restaurante Ferrugem Renato Cunha

O café e o pastel, agora si, de nata

Para os datos xerais de Ferrugem podedes consultar a entrada da nosa anterior visita.
Salientar que a proxección desde entón é case imparable. Ademais de todos os destaques alí mencionados, a día de hoxe xa foi Garfo de Ouro no Boa Cama Boa Mesa, xa acadou 1 sol na guía Repsol, e tamén entrou na Michelín de 2014 como BibGourmand.