Furancho Alto da Aldea (Soutelo). Lugar de Soutelo 33, Goián (Pontevedra). 670599960. Auténtico furancho acollido ao Decreto 201/2012. Famoso polos seus viños e polos embutidos caseiros. Prezos moi, moi axustados.
Temos falado en diferentes ocasións do tema furanchos. Do que significan na tradición galega. Da competencia ilegal. Do intrusismo…
A día de hoxe, moitos dos que no seu nome se anuncian como ‘furanchos’ están acollidos a outra variedade de establecemento de restauranción que non é a de furancho (bar, mesón, restaurante, tapería, etc…). Son poucos, este do Alto da Aldea (tamén coñecido como Furancho de Soutelo), que manteñen a auténtica esencia furanchil.
Ás veces non está de máis lembrar a lexislación que regula os furanchos (Decreto 215/2012, de 31 de outubro, polo que se regulan os furanchos da Comunidade Autónoma de Galicia).
Despois de caracterizar legalmente os furanchos (“locais utilizados principalmente como vivenda privada onde os seus propietarios/as venden o excedente do viño da colleita propia, elaborado en casa para o seu consumo particular, xunto coas tapas que, como produtos alimenticios preparados regularmente por eles/elas, servan de acompañamento”) o decreto especifica os requisitos prácticos que deben cumprir os furanchos:
- O viño debe saír directamente do barril e, polo tanto, non pode ser embotellado.
- Poden ofertar ata un máximo de 5 tapas entre as opcións que se marcan no Anexo correspondente (táboas de queixo-embutidos, pementos de Padrón, orella-chourizo, zorza-lombo, costela, ovos fritidos, sardiñas-xurelos na brasa, callos con garavanzos ou fabas, tortilla de patacas, empanada-empanadillas, croquetas).
- Antes da tempada terán que cumprimentar unha serie de requisitos entre os que están a declaración obrigatoria do sector vitivinícola, a regularización da totalidade dos viñedos no rexitro correspondente, etc.
- Deben observar os requisitos sanitarios referidos á lexislación de elaboración, distribución e comercio de alimentos preparados.
- Cumprir a normativa de prevención e protección contra incendios, a sanitaria fronte ao tabaquismo e todas as que sexan legalmente aplicables.
- Terán que ter follas de reclamacións.
- Teñen que emitir un xustificante de pago dos servizos prestados.
- Deberán ter en lugar visible a póla de loureiro que os identifica como furanchos.
- Póliza de protección civil.
- Documento de ter abonado as taxas correspondentes para a actividade.
Outros aspectos de interese que afectan á regulación dos furanchos poden ser:
- A lexislación dos furanchos corresponde á Xunta de Galicia.
- O rexistro e control depende dos Concellos.
- Os furanchos só poderán abrir un total de tres meses ao ano.
- O período de apertura irá desde o 1 de xaneiro ao 30 de xuño.
- Excepcionalmente, e previa solicitude, a apertura poderá ir ata o 31 de xullo (sempre respectando o máximo de tres meses)
Este ano, o furancho Alto da Aldea abre entre o 1 de maio e o 31 de xullo coas tapas e prezos que vedes na foto. O horario é de luns a venres de 20 a 24 horas e sábados, domingos e festivos de 12 a 24 horas. Os mércores está pechado.
Nun entorno rural, dispón dun amplo aparcamento. As mesas están todas no exterior aínda que a maioría cubertas. Así a ollo de bo cubeiro, ten capacidade para unhas cen persoas.
É imprescindible reservar pois está sempre a tope. Para facelo abonda con enviar un whatsapp a número de teléfono do furancho (670 599 960).
Somos dous e pedimos unha xerra pequena de viño branco (albariño); está bastante bo, mellor que a maioría dos que temos probado ultimamente noutros furanchos. Ten, ademais, un rosado elaborado con uvas de morango, e o tinto (múltiples uvas). A cazoliña de lentellas é a tapa de cortesía que vén hoxe co viño.
Para min, sen dúbida, e no tocante ás tapas, o protagonismo absoluto é para as táboas, neste caso de embutidos; trátase de embutidos caseiros: salchichón, chourizo doce e picante, xamón, lacón prensado con pemento e aceite, e un paté caseiro. Son todos moi, moi ricos, sen poder destacar ningún nin por arriba nin por abaixo (quizá, o xamón cortado a máquina un pouco fino de máis). O prato que vedes na foto é de media táboa, cun prezo de 6€, e máis que suficiente para dúas persoas.
As empanadillas veñen precedidas da súa sona; son seis variadas (metade de bacallau e metade de legumes-pisto). Están boas. Quedounos a espiniña de probar a empanada.
Os ovos fritidos con patacas e chourizo. Os ovos están moi ben fritos, con puntilla e a xema preparada para mollar o pan; os tropezóns de chourizo moi ricos, e as patacas un pouco por debaixo da media, pero tamén boas.
De sobremesa ofrecen cunca de kiwis ou cunca de mirabeis. Tiramos por unha de mirabeis para compartir; están no seu punto; maduriños e embebidos nun xarope ben elaborado.
Por todo o anterior pagamos 29€ (Viño 5€, media táboa de embutidos 6€, seis empanadillas 8€, os ovos fritidos con chourizo 6€, os mirabeles 3€ e 1€ polo pan.
O prezo está moi, moi ben. E da relación calidade-prezo…, mellor xa nin falar.
Opción óptima para unha comida, merenda ou cea, pero hai que aproveitar os tres meses de apertura e, en todo caso, reservar.
Furancho Alto da Aldea
- (Furancho de Soutelo)
- Lugar de Soutelo 33
- 36750 Goián (Pontevedra)
- 670 599 960
- GPS: 41.956629N, 8.7818043O
- Cociña: tradicional, tapas, furancho
- Prezo 10-15 euros
- Apertura: 3 meses ao ano (maio a xullo), luns a venres pola tarde; sábados, domingos e festivos mediodía e noite. Mércores pechado