Enxebre. Marcos Rodríguez e Patricia Uceda. Rúa Cuba, 26, Vigo. 654306454. Cociña imaxinativa, divertida e cun toque canalla. Espazo moi coidado, limpo, moderno, agradable. Servizo esmerado e profesional. Prezos comedidos.
Para unha inmensa minoría.
Declaración de intencións para este Enxebre que trae novos aires á cidade de Vigo.
Produtos de tempada e cercanía, sometidos a preparacións diversas, con toque imaxinativo e desenfadado, para concretar unha carta deseñada en base ás preferencias dos visitantes.
Croqueta de atun shukiyaki (8 unidades, 10€), Chula de brandada de bacallau (8 unidades, 12€), Centola á donostiarra + escuma do seu coral (20€), Tortilla vaga con txistorra e kale (16€), Panna Cotta afumada + queixo sável + uvas ao Pedro Ximénez (13€), Ramen de sopa castelá (10€)…
Principais: Canelón de faceira de tenreira con bechamel de foie (20€), Escalope + ovo + trufa (20€), Corvina asada e allada galega (17.50€), Cordeiro de leite + milfollas de pataca (18€).
Ofrecen, tamén, un menú de degustación de 35 e outro de 45€. Pedimos o menú curto.
A manteiga que acompaña ao cuberto vén afumada con lume de videira. As pólas de videira están presentes en varias das preparacións, neste caso para dar á mantequilla un sabor realmente rico. O afumado non é anecdótico e sutil, senón que se converte en protagonista.
Segundo esgotan as existencias van preparando novas sorpresas para dar sabor a unha manteiga que xa por si mesma é de boa calidade.
Primeiro prato e primeiro retrinco anunciado como “trampantojo“. A folla do cogollo (vén sobre poliñas de vidueira) está aliñada cun mollo levemente acedo que ten caldo de carne; o resultado achégase ao que pretende: superar o concepto ensalada e achegarse ao sabor dunha auténtica hamburguesa (a folla de leituga, o sabor a carne, o queixo por riba…).
Unha especie de xogo cos sentidos cun deseño e execución moi salientables.
Segundo xogo de despiste. A “empanada” vén en forma de chula; a masa, moi lonxe dunha masa tradicional e máis próxima ás chulas, casa á perfección cunha zaragallada que si reproduce con mestría unhas vieiras á galega. Sorpresa moi agradable.
Un paso máis: o Pan brioche recheado de xarrete de vaca estufado. Unha volta de bota para un bocata (prefiro o de bocadillo antes que o sándwich) no que destaca o contraste do pan cunha carne moi saborosa e zumenta.
O Arroz verde con berberechos non agocha segredos. Un arroz meloso, ao dente, coa substancia dos berbechos e a cor (e o aroma) do pirixel. Os berberechos, carnosos e substanciosos, moi ricos. O conxunto, un plato que agrada especialmente.
A pescada tampouco entra nos xogos de despiste. Un bo lombo de pescada, ben tratado, co seu mollo bilbaíno de perfecta execución. A novidade, esas burbullas que asoman na salsa e que son esferas de mollo de maniñas (pero que se perden no contexto do prato; ou se lles dá un chisco máis de protagonismo ou resultan perfectamente evitables).
A salsa bilbaína está elaborada a base de allos, chile, aceite de oliva, vinagre e pirixel; o chile non molesta e os tropezóns de allo fritido resultan moi agradables.
Un plato principal sinxelo pero executado con moito sentido.
A sobremesa é unha base de merengue con xeado de lima e zumes cítricos por riba; todo regado cunha sopa de chocolate branco. Gustoume dun xeito especial. A acedume contrasta marabillosamente cun merengue que me lembra á infancia. O nome oficial: Paulova cítrica.
Con café, dúas copas de Diego Rivera (Ribera con algo de carballo, moi digno) e auga, pagamos 38€.
Parécenos un prezo xusto (tirando a baixo) por unha comida moi completiña: diferente, rica e axustada de cantidades.
Desexamos o mellor dos futuros para este Enxebre que, na primeira visita, entusiasmounos.
Só esperamos que non se malogre por pretender xogar nunha liga que non é a súa.
Enxebre
Marcos Rodríguez e Patricia Uceda
- Rúa Cuba, 26
- 36204, Vigo (Pontevedra)
- 600 86 74 16 / 654 306 454
- GPS: 42.232885N, 8.7167026O
- enxebrevigo.com
- Cociña: con-tradi(c)cion
- Prezo: menús 35-45€
- Peche: luns e martes; domingo noite