Casa Rosita, Cambados, non necesita presentación. Peixes e mariscos de primeira calidade resumidos nun prato estrela: o salpicón de mariscos; é histórico en todo o Salnés e traspasa as fronteiras.
Conservo unha factura de Rosita dos anos oitenta; cando aínda estaba no centro da vila, na rúa Isabel II, nun primeiro piso…
Xa choveu. Pero daquela xa tomamos o salpicón. Por aqueles tempos Carmen estaba no colexio de Tremoedo e eran míticos os menús do día de Rosita dos luns: marisco a rachar; o marisco que quedara da voda do domingo.
Si, o tempo pasa que non nos enteramos. Pensei que Rosita xa estaba neste blog pero non, non atopo a entrada por ningures; isto quere dicir que xa había dez anos que non lle faciamos unha visita. Busco nas facturas e atopo unha do ano 2005, un día de san Pepe; e, claro, tamén o salpicón… A diferenza: nos anos oitenta 900 pesetas a ración, no ano 2005, a 11.50 euros.
O sábado tamén estabamos de celebración, a xubilación do noso amigo Luís. Cada día que pasa somos un máis no club…
Marisco e postres. Para beber, Viña Costeira. Aí vai a testemuña en imaxes:
En Casa Rosita non descoidan as sobremesas. Son, tamén, míticas, as súas filloas (neste caso recheadas de xeado de nata ou vainilla), e a gran atracción foron os amorodos con nata (e algo máis: un fantástico follado que se converteu nun dos protagonistas da comida).
Moi boa comida. Moi recomendable para comida mariñeira. O prezo…, está feo falar de prezo cando vas invitado; en calquera caso dicir que non é un deses locais regalados, pero tampouco cobran por toda a historia e a sona que levan con eles.
Casa Rosita
Mercedes Pérez
Lugar de O Riveiro, 8
36634 Cambados (Pontevedra)
986 542 878
Web
Facebook
GPS: 42.529309N 8.810983O
Cociña: caseira, galega, mariñeira.
Prezo: menú 18€. Sobre 35€ sen marisco
Peche: domingo
Repsol: mencionado
Michelín: mencionado como restaurante de hotel
TripAdvisor: número 5 de restaurantes en Cambados