Restaurante Alberte. Alberte Gutiérrez. Rosalía de Castro 65, Vigo. 986899019. Cociña gourmet con base nas brasas e acabados sofisticados. Local fermoso e confortable, servizo profesional e prezos un pouco elevados.
Despois do éxito de Hierba Luisa e do paso fugaz pola viñoteca El buen vivir, Alberte Gutiérrez preséntanos o seu proxecto máis persoal e ambicioso.
Nun dos epicentros da gastronomía en Vigo, a rúa Rosalía de Castro, atopamos un local moi amplo, coidado ata extremos mínimos, fermoso, cómodo, acolledor. Dominan a cor negra dos asentos e a madeira natural dos plafóns das mesas; as paredes, sen recebar, pintadas nun gris con toda a feitura dun decapè.
Todo sen máis complicacións, sen adornos innecesarios, para dar unha medida sensación de modernidade, minimalismo e de
Moito espazo e poucas mesas; unha barra para seis persoas comparte a zona de traballo da cociña; ao fondo, un reservado para comidas de grupo.
Todo en su punto para que o cliente ‘disfrute da experiencia’, e poida definila como ‘impecable’.
A cociña, á vista, montada polo grupo Roig, destaca pola súa grella de carbón vertical (estilo vasca) con volantes para a súa elevación automática. E isto, porque a grella é a protagonista da cociña de Alberte para procurar o seu obxectivo de que cada momento no seu restaurante sexa algo ‘diferente i especial’.
Para isto, a oferta é case artesanal; o que cociña é Alberte; se Alberte non está, non hai servizo. Ademais, e dentro da súa amplitude no tocante ao espazo, o local está preparado para non máis de 20-25 comensais; trátase de dar unha atención individualizada na que cada comensal se senta protagonista.
A carta, estacional, está centrada no produto de calidade, que segundo o propio Alberte, debe ser un material ‘bo, ético e sostible’.
Entre os entrantes están as Croquetas de boletus e parmesano (12€), o Salpicón de centola (50€), as Ameixas á mariñeira (29€), a Medula de vaca á brasa con navallas de Aldán e chip de alga nori (25€) ou os Chícharos do Maresme con butifarra do Perol (26€).
Entre os pratos principais hai que diferenciar entre as carnes e os peixes. Os peixes, normalmente son da lonxa de A Guarda e dependen tanto da tempada como do propio mercado do día; en calquera caso sempre está o Linguado salvaxe na brasa (100€/kg), o San Martiño na brasa (75€/kg), ou o Rodaballo na prancha (ou brasa) con unha base fina de pataca, cebola salteada, chips de allo e alcaparras (45€).
Somos catro e comezamos compartindo uns Espárragos frescos de Navarra con maionesa de allo asado e a Empanada de fariña de castaña do Deza recheada de polbo da ría.
A empanada está moi rica (saborosa, sutil, no punto de zume…), pero se teño que quedarme con un prato encantáronme os espárragos. De calidade suprema, traballados perfectos na brasa e cunha maionesa delicada que reforzaba un sabor xa de por si explosivo.
Canelón de foie e tenreira galega con Tuber melanosporum, salsa de queixo trufada e galleta de Parmigiano Reggiano.
Paletilla zamorana de cordeiro de leite á brasa con pataquiñas e chalotadas risoladas ao tomiño.
Bacoriño asado desosado con albaricoques e nésperas na brasa.
O meu Tendón de tenreira galega marcado e glaseado con garavanzo negro estufado.
Seixa os catro pratos estaban excepcionales; probei apenas un bocado de cada e, dentro dos meus límites, podo dar fe. Pero como ocorría cos espárragos, teño que dicir que quedei encantado co meu prato. Sen facer ningún feo aos garavanzos, o tendón estaba simplemente exquisito; sabedes da miña debilidade polas talladas de carne ‘sucias’ e o tendón é un dos máximos expoñentes. Nunca o probara tan sinxelo e tampouco tan complexo; paso excepcional pola brasa para un resultado brutal.
A carta ofrece dous pre-sobremesas: o Surtido de xeados feitos na casa (5€) e o Carro de queixos seleccionados (25€ tres cortes, 35€ cinco cortes).
Probamos tres dos queixos e estaban bos, pero sumaron pouco á comida. Só, e ben, na factura.
Ademais desta Crema brûlée de herba Luisa con xeado de herba luísa, e da Milfollas de follado de manteiga, maza e xeado artesán de vainilla Bourbon (dúas), había unha apetecible Tarta de mousse de chocolate Barry, biscoito de améndoa, crema de mango e xeado artesán de abelá.
A milfollas é outra das miñas preferencias, neste caso no momento dos doces. Estaba fantástica; destacaría o acabado das mazás cortadas ao dadiños e o contraste co follado e o agradable sabor do xeado. Unha exquisitez.
Bebemos unha botella de Pedrazais 2021, Godello sobre lías (moi rico i equilibrado para os diferentes momentos da comida), auga e dúas cervexas sen alcol. Tomamos cafés e pagamos algo máis dos 62€ por persoa. Fóra a materia prima, fóra a inversión no equipamento e decoración, fóra o traballo das persoas…, pareceume un pouco caro. Comín ben, moi ben, pero sen ese plus que pode xustificar un prezo que considero elevado.
Alberte
Alberte Gutiérrez
- Rúa Rosalía de Castro 65
- 36201, Vigo (Pontevedra)
- 986 89 90 19
- GPS: 42.237964N, 8.712091O
- alberte.es
- Cociña: brasa, tempada
- Prezo: 60-80 euros
- Peche: martes; luns, mércores e domingo noite