A Adega Faustino é un caso típico de local tradicional e popular para degustar uns petiscos. Autenticidade a prezos baixos. Bolos de bacalhau, alheira, presunto de Chaves, rojões, moelas, dobradinha…
Antigo almacén de patacas reconvertido para a restauración a finais do pasado século. O primeiro que chama a atención son as portas e ventás vermellas nunha ruela céntrica pero un tanto escanastrada.
Xa dentro, destacan o chan de calçada portuguesa, a estrutura de madeira que sostén o tellado e a amplitude do espazo. Decoración básica e sinxela (toneis, o propio balcão , mesas corridas cubertas con manteis de cadros…). Algúns obxectos de museo, pequena galería de arte e, ás veces, fado en vivo.
A cabalo entre o turismo e os incondicionais locais.
A carta está baseada nos petiscos e vai desde os rins salteados (6€) ata o salmón (6€); desde as coxinhas de rãs (6.5€) ao prato de presunto (8.5€); desde o pica-pau (7.5€) ou a orelha com vinagreta (4.5€) aos rojões do redanho (2€ unidade). Ademais, algúns pratos de maior consistencia como as costeletas de cordeiro (8.5€), o bife de vitela (9€), a pescada (grelhada, frita, cozida, 6.6€) ou o bife de atum (8€).
Somos catro e estamos a 26 de decembro despois dunha ponte festiva e de temporal; cometemos o tremendo erro de pedir peixes en Tràs-os-Montes.
4 bolos de bacalhau, 3 rissois de camão, unha alheira, carapus fritidos, unha truta, chocos grelhados, bacallau con pementos e dúas de arroz de tomate.
Comida con luces e sombras: os xureliños non estaban bos e os chocos regular; o resto entre o ben e moi ben. Para beber, dúas canecas de viño da casa.
Tomamos catro sobremesas: toucinho de ceu, mousse de chocolate e leite creme e os catro cafés. Pagamos 17.5€ cada un.
Foi unha mágoa a metedura de zoca cos peixes pois fixo descender notablemente a opinión xeral da Adega Faustino. O prezo está moi axustado e anima a unha nova visita para probar novos pratos, espero, con algo máis de sorte.
Adega Faustino
Travessa Cândido dos Reis
5400-164 Chaves
351 276 322 142
GPS: 41.740507N, 7.468883O
Web
Cociña: rexional, portuguesa
Peche: domingo
Prezo: 20€