Santiago Bidea, pensión rústica-restaurante, é un proxecto que vén de nacer en Gonte (Negreira) co espaldarazo mediático de Arzak. Asoma con certas notas de incertidume que haberá que repousar.
A filosofía do local revélase de xeito nítido nas múltiples reseñas das que se fixeron eco os medios de comunicación: menú sinxelo a prezo asequible… cociña tradicional como base para evolucionar… importancia do produto… unión a través da cociña das culturas galega e basca…
Oihana Chico e Julen Lizartza serán os responsables do que poida pasar.
O espazo é moi agradable. Mantendo a esencia do entorno rural (pedra e madeira), introduce pinceladas de modernidade (silla Eames) que enriquecen un conxunto que, co seu aire minimalista, acaba por resultar acolledor.
Dous pequenos comedores. O noso, para grupos non numerosos, con porta ao xardín, escaleiras aos cuartos, ventá de transición entre a cociña e as salas…
Contan cun menú de inauguración que consta de aperitivos (‘banderilla’ de bocarte, oliva, croqueta de xamón, croqueta de queixo con pemento de Padrón), un entrante a elixir entre tres (revolto de lagostinos e allos tenros, ameixas en mollo verde, ensalada de luras), un peixe (bacallao á allada arrieira ou chincho fritido), carne (solombo ou magret de pato) e sobremesa (sopa de chocolate branco ou torta de pera). O prezo: 35€ máis bebidas (no noso caso con auga e unha botella dun vello coñecido: Cepas Viejas).
As referencias son que, unha vez pasada esta febre inicial, a carta será a que marca a filosofía da casa: ensaladas, pementos do piquiño, bacallaos, arroces, guisos, carnes galegas… todo, con receitas da cociña basca e a un prezo que pretende situarse entre os 35-40€ por comensal. De feito nós pagamos 39 por cabeza.
Vaia por diante que as présas nunca foron boas conselleiras. O local empezou a funcionar o mércores 7 de setembro e nós tiñamos reserva para o sábado 10 ao mediodía, coma quen di, o primeiro día de traballo serio. Quizá demasiado pronto.
E esa é precisamente a miña impresión: unha certa sensación de provisionalidade, de falta de ritmo, de que aínda quedan asperezas por pulir… tanto na cociña coma no servizo.
Semella que a base existe: unha filosofía clara e unhas mans co coñecemento e a técnica necesaria para sacar o proxecto adiante (cuestión á parte sería se a filosofía é a máis axeitada para o tempo e sobre todo o lugar).
A ‘banderilla’ un chisco simple de máis, as croquetas a bastante altura, o revolto normal, o mollo das ameixas moi logrado, a ensala algo insulsa, o bacallao gustoume moito, os chinchos non tanto, e as carnes perfectas no seu punto de cocción (pero, en contra das modas, boto de menos un acompañamento tradicional; é ben sabido que as carnes a pelo fánseme cada vez máis difíciles de dixerir; problema do animal).
As sobremesas ben na elaboración pero un chisco ‘sosas’ no deseño e empratado.
En conxunto, ben… ben sen máis espaventos. Creo que debería quedar pendente dunha valoración máis nítida á espera de tempo, de repouso, dun necesario período de rodaxe, de que as ideas acaben de asentar e callar nunha práctica con máis consistencia.
Non está aí ao lado, á volta da esquina; será un restaurante deses aos que, esteas onde esteas, hai que ir. E cando vas, poñamos por caso, desde Vigo, e con moitas expectativas previas (lado escuro dos grandes lanzamentos mediáticos), tes que atopar algo máis que o que nós atopamos o pasado sábado.
Santiago Bidea
Oihana Chico e Julen Lizartza
Gonte 31.
15839, Negreira (A Coruña)
Tlfno: 981 886 342
www.santiagobidea.com
Facebook
GPS: 42.899629N, 8.766870O
Cociña: basca con produtos galegos.
Prezo: 35-40€