o tasco regional

O Tasco regional, en Castelo do Neiva, é un exitoso proxecto que mestura tenda e tasca, bar e restaurante, viño e champarrião, clasicismo e modernidade, táboas con polvo à lagareiro.

O Tasco Regional 5

Despois da borracheira sensorial de onte, no Euskalduna Studio, hoxe o corpo pedía unha tregua, apetecía un paseíño de vagar por Porto e regresar, con calma, polas vellas estradas portuguesas.

O paseo converteuse nunha persecución voraz dalgúns dos exemplos de arte urbana que tiñamos no círculo no que estabamos (Bonfim). Foi así que descubrimos algunhas pequenas xoias perdidas.

Porto Graffitis 2 Hazul  Porto Graffitis 3 Hazul
Tres ou catro de Hazul

Porto Graffitis 6 The Caver   Porto Graffitis 7 The Caver
The Caver

Porto Graffitis 11  Porto Graffitis 12
Mensaxes anónimas

Porto Graffitis 10
Mensaxes rompedoras non tan anónimas (STRA)

Porto Graffitis 8
Mensaxes reivindicativas

Porto Graffitis 24   Porto Graffitis 54
Arte pura

Porto Graffitis 28   Porto Graffitis 31
En fin, grandes murais…

E xa que estamos, deu tamén para unha das miñas teimas actuais na fotografía: fotos que non semellan fotos senón pinturas; pequenas imaxes urbanas que, sen intencionalidade, imitan o mundo da arte.
Quede, como exemplo, este pequeno cadro cubista: a porta en descomposición dunha casa en descomposición na rúa de Santos Pousada. A dexeneración, coa súa fermosura, fronte por fronte á estación de metro do Campo 24 de agosto de Souto de Moura.

Imaxes Porto 5 
Porta da casa rúa Santos Pousada número 79

DebuxoSoutoMetroPorto
Debuxo de Souto de Moura para estación de Metro de Porto
Imaxe (:) Souto de Moura, Metro Porto. Fundación Compostela arquitectura, 2014

Quixeron os tempos que a comida nos pillase cerca de Castelo do Neiva, na N13-3, e, a verdade, co corpo máis para un pasatempo que para a restauración dos corpos en sentido literal.
Castelo do Neiva é praza complicada para destacar na cousa do bo comer. Abonda con deixarse caer pola praia e probar un marisquiño ou un peixe acabado de coller en calquera dos restaurantes.
O noso preferido, de sempre, é o Segredos do Mar.
Tiña referencias deste Tasco rexional despois de procurar locais en Viana e arredores; asomaba moi arriba competindo coa oferta do propio núcleo urbano; en TripAdvisor é o número un entre todos os restaurantes de Castelo do Neiva (e, lembramos, non é praza fácil).

O Tasco Regional 6

O de tasco vén de tasca e, se cadra, cun transfundo aínda máis popular, máis auténtico.
Local moi pequeno, moderno conservando a esencia rural, e ateigado de botellas de viño por todas partes, botellas que, xunto cos produtos da zona, están á venda.
O servizo é amable, directo e moi eficiente.

O Tasco Regional 3

A carta, alá arriba, escrita no encerado, e como non podía ser menos, rodeada de botellas de viño; é ampla, de fondo tradicional, e, sobre todo, moi versátil, válida tanto para un roto como para un descosido.
Hai petiscos, táboas, pratos de sempre e algúns representantes da gastronomía local, dese mar que aquí é xeito de vida (polvo, ovas, búzios, ameijõas, mexilhão, navalhas, gambas ao alho…).

O Tasco Regional 4

Entre os petiscos, as moelas (4€), rojões (4€), ovos rotos (10€), prego á Tasco (4.5€), févera á Tasco (4.5€), alheira (6€) pica pau (6€), francesinha (9.5€)…
Táboa mixta, de queixos, ou tamén de enchidos, calquera delas por 13€.
Polvo á lagareiro (17€), bacalhau (16€), posta na chapa (17€), alheira con ovo (8€), pernil (15€), etc.
E entre os petiscos do mar, ensalda de polvo (5.5€), ovas (6€), mexilhão (8€), navalhas (9€), zamburinhas (9€), camarão panado (9€), etc.
Hoxe, ademais, tapa de bacalhau frito (6.5€) ou coxinha de paspallás (8€).

O Tasco Regional 7   O Tasco Regional 8

Pedimos uns rissois de carne e outros de camarão, un par de bolos de bacalhau, e a táboa mista.
Todo está fantástico. En especial os fritidos, os rissois e o bolinho, acabados de facer, saborosos, cero graxentos, en fin, un ledicia.
Boa calidade de embutidos e queixos acompañados dun magnífico pan.

O Tasco Regional 9

De sobremesa, unha boa representación do Portugal máis doce: pudim, tiramisú, natas do céu ou baba de camelo (calquera deles por 3€), e queijo com marmelada (4€).

Con café, dúas copas dun rico tinto do Douro e auga pagamos 16 euros por persoa; prezo ben axustado para o que comemos. Resultou unha comida perfecta para o que procurabamos.
O Tasco regional é un local claramente recomendable para satisfacer padales esixentes en diversas conxunturas. O local é moi pequeno así que convén reservar.

O tasco regional
Avenida Central 2450
(Estrada N-13-3)
Castelo do Neiva
4935-574, Viana do Castelo
+351 258 075874  /  925439296
GPS
Facebook
Cociña: tradicional
Peche: luns
Prezo: 12-30€
Número 1 en Castelo do Neiva en TripAdvisor