menos mal que nos queda…

O dato, claro e sen reviravoltas: comer nun restaurante con estrela Michelín chega a resultar ata 6 veces máis caro nun restaurante do norte de Portugal que nun da Galiza.

A un, que procura estar ao día no que se coce nos restaurantes de Galicia e norte de Portugal e que vai deixando todo un ronsel de indicios cando navega por internet na busca do último dato, ás veces chégalle publicidade que, tras o tamiz da reflexión, pode transformarse en información.
Nos días previos ao san Valentín chegáronme varias ‘ofertas’ de restaurantes portugueses de postín para celebrar o día dos namorados cunha cea especial (seica algo moi típico en determinados ambientes do país irmán).
Poñamos dous exemplos: Restaurante Antiqvvm (Porto), coa súa acabada de estrear estrela Michelín, e sen deixar moi claro se con bebidas incluídas: 140€ por persoa (280 a feliz parella). Restaurante The Yeatman (Vila Nova de Gaia), tamén coa acabada de estrear, neste caso segunda estrela, con maridaxe incluído: 200€ (400 euros a parella).

Despois de superar o k.o. inicial (o dato pareceume demoledor), e de regresar á realidade dun mundo que non acaba de levantar a cabeza da crise, deume por pensar que tampouco se trata dun descubrimento novidoso, que ultimamente xa me estaban a chamar a atención os altísimos prezos dos restaurantes de elite en Portugal.

Así pois, mans á obra.
Para dar credibilidade ao estudo había que buscar datos homoxéneos.
O primeiro: para poder comparar, era necesario un menú o máis equivalente posible, e para isto, o mellor, era botar man aos diferentes menús de degustación que ofrece cada local (nas súas dúas versións máis extremas: curto ou máis longo). Segundo: o dato máis fiable sempre vai estar na fonte primaria; aquí topeime co problema insalvable de que hai restaurantes (poucos) que non teñen páxina web e outros (bastantes máis) que non inclúen os prezos na información da páxina; non era cuestión de comparar prezos provenientes de diferentes fontes. Terceiro: o criterio de selección; aquí si que a obxectividade non daba demasiadas opcións; entre soles e estrelas, e quizá por repercusión mediática e social, tirei pola Vermella. E cuarto: a Guía Michelín, na ficha de cada restaurane, inclúe un apartado co prezo máximo e mínimo do menú de degustación; presupoñendo (talvez moito presupor, pero non se me ocorreu solución máis fiable) que tratándose da mesma fonte a posibilidade de sesgo ou erro tería unha desviación semellante para todos os restaurantes, optei por dar conta deste dato.

E aquí están os resultados:

Prezo do menú de degustación en restaurantes con estrela Michelín

Restaurante	Localidade	Mínimo	Máximo	Medio
Nova	Ourense	28	56	42
Maruja Limón	Vigo	38	82	60
Yayo Daporta	Cambados	50	95	72,5
Alborada	A Coruña	50	–	50
Árbore da Veira	A Coruña	55	70	62,5
Culler de Pau	O Grove	57	90	73,5
A Estación	Cambre	57	77	67
As Garzas	Malpica	60	–	60
Retiro da Costiña	Sta Comba	65	100	82,5
Pepe Vieira	Raxó	69	84	76,5
Casa Solla	Poio	83	108	95,5
	Media:	55,5	84,5	67,5
Pedro Lemos	Porto	80	120	100
Largo do Paço	Amarante	85	135	110
Casa de Chá	Leça	85	120	102,5
The Yeatman **	VN Gaia	90	145	117,5
Antiquum	Porto	110	–	110
	Media:	90	130	108

Os resultados saltan á vista.
A interpretación, a análise… é fariña doutro costal que deixo para unha segunda entrega: menos mal que nos queda… Galicia.