magnífico menú de degustación en morro fino

A Taberna Morro Fino, rúa Serafín Avendaño de Vigo, apunta moi boas maneiras. O menú de degustación (39€) resultoume redondo. Variado, xusto nas proporcións, ben elaborado, con ritmo… Unha sorpresa.

Morro Fino 01

Malia a calificación de ‘taberna’, que podería despistar, pois é, en todo, a antítese dunha taberna tradicional, Morro Fino fai honor á súa sona.
Morro fino: dícese da persoa de padal esixente e fino, que non se conforma con calquera cousa que lle boten no prato’.
Pois iso, a Taberna Morro Fino non defrauda aos comellóns de morro fino.

Morro Fino 30Morro Fino 31
(imaxes do portal da COAG)

O primeiro que sorprende é a decoración: premio Gran de Area 2018 de aportación á arquitectura do COAG (arquitectos Fuertes-Penedo). O proxecto de reforma partía de catro presupostos: a amplitude do local, o presuposto limitado, as ideas claras sobre o tipo de negocio e o protagonismo que se lle quería dar á cociña, converténdoa en partícipe da unidade do local. O resultado, unha ‘taberna contemporánea’.
Trátase dun local moi diáfano, informal, rabiosamente moderno, no que se mesturan á vista diferentes materiais con acerto, cun resultado equilibrado, agradable, moi urbano. Por momentos (algúns cadros das paredes) divertidamente irreverente.
Unha gran barra separa a zona de cociña (aberta) da de mesas; ao fondo, un espazo separado por un tabique de ladrillo visto, cunha mesa para grupo mediano.

Morro Fino 12Morro Fino 13

Persoal profesional, competente, no seu lugar pero próximo, preocupado en todo momento pola nosa satisfacción e pola opinión sobre cada un dos pratos que van traendo con moi boas maneiras.

A carta que prepara o chef Víctor Fernández resulta moi atractiva dentra da súa mestura de técnicas tradicionais, produtos locais, aportacións internacionais e a creatividade e depurada técnica do cociñeiro. Os pratos non son porque si, porque está de moda este condimento ou aquela preparación e imos xuntalos a ver que pasa. Non. Percébese de xeito moi nítido que os pratos están profundamente meditados e traballados. É a parte fundamental do éxito que lle auguramos. Aporta un plus importante a esa chea de locais de medio pelo que se limitan a copiar ‘pratiños’ ou a mesturar ideas ao chou, sen ton nin son.
Este concepto tamén aporta un pequeno plus ao resultado final da conta pero, creo, totalmente xustificado.
Atopamos propostas como O Tiradiño de xurelo en escabeche con nori (11,95€), o Steak tartar con alioli de allo negro (14,95€), as Cocochas confeitadas con setas (13€), a Pizza de mozzarella de búfala e vexetais (9.95€), o Canelón de polo de casarío con salsa pepitoria (12,5€), etc.
Entre os pratos máis potentes están o Arroz de carabineiro e costela de porco (16.95€), o Rabo de vaca con crema de pataca (16,95) ou o Lombo de vaca vella con piquillos confeitados e patacas (17,95).
Curta, e algo extraña, carta de viños. Comemos con auga e unha botella de Adobe (Ribeira Sacra 2017, 15,15€).

Morro Fino 16 Morro Fino 17

Pedimos o menú de degustación (39€) e para abrir boca obséquiannos cunha manteiga de pemento da Vera (exquisita) e uns nachos con mollo.

Morro Fino 19

Todos os pratos do menú están na carta e a festa comeza pola Vieira de Cambados, crema de allo porro e migas crocantes. Bo comezo. Atípica preparación da vieira pero resultona; a mestura das textuas e sabores funciona moi ben na boca.

Morro Fino 21

Gofre de pataca con kimchee e anguía afumada. Para min, persoa de sabores fortes e adicto a anguía en todas as súas preparacións, un dos momentos estelares da comida.
O ‘gofre de pataca’ crocante e moi rico, sen graxa, e a enguía afumada potente pero sen pasarse, moi saborosa; e, por fin, a salsa coreana, aporta frescura sen enmascarar os sabores. A mestura, unha ledicia.

Morro Fino 24

Tartar de atún vermello picante con ovos rotos.
Moi ben. Quizá o máis obvio de todos os pratos pero non por iso menos rico. Perfecta elaboración.

Morro Fino 25

Orella, gamba doce curada e salsa brava cítrica. A orella, prensada e moi torradiña, fantástica; quizá o segundo bocado do día; e a mestura mar-terra produce un cúmulo de sensacións no padal que transforman o prato nun éxito absoluto. Delicioso.

Morro Fino 26

Big duck con mantou. Ou sexa: hamburguesa de pato con lascas de queixo por riba, boliño de pan chinés, xeado de mostaza verde e esferas de mostaza. Rompedor. Moi equilibrado na súa variedade. Póñoo no terceiro lugar do menú.

Morro Fino 28

E, xa por fin, as dúas sobremesas. Escuma de laranxa, amorodo e froitos vermellos. Bo final. A delicadeza da escuma, o frescor do xeado, o estoupido dos anacos de morotes…

Morro Fino 32

Non é o típico flan. Así vén na carta. E, en efecto, resulta diferente. Especialmente suave, moi, moi cremoso, coa capa superior triscante… Moi rico. O remate perfecto.
Agradecemos especialmente que o menú traia dous doces en vez dun prato máis de salgado e unha soa sobremesa. É un pequeno detalle que, para os nosos gustos, aporta un punto extra ao menú de degustación.

Son moitos os detalles que destacan a Taberna Morro Fino da media de restaurantes do seu nivel. Fixádevos, por exemplo, nas fotos, na varidade e oportunidade da vaixela.
Ademais do empratado dos alimentos, os propios pratos forman parte da escenificación: axústanse en cada caso ao que levan por riba.
Como exemplo aí vai nha vista completa do prato de enguía (sobre unha especie de pizarra grosa e non moi traballada, que trae labrada a espiña dun peixe)

Morro Fino 22

Unha gran experiencia lonxe da media local. O Morro Fino de Víctor Fernández empeza a correr no boca a boca, no díxomedixome e xa sabemos o porque. A pesar de ser, coma quen di, un recén nacido, comeza a ser visita obrigada en Vigo.
A visita non pode deixar indiferente e con toda probabilidade vai ser do agrado das persoas que, admitindo ou non que o teñan, si gozan dese morro fino.

Taberna Morro Fino
Víctor Fernández

R/ Serafín Avendaño 4
36201, Vigo (Pontevedra)
886 114 204 / 698 119 477
Web
Facebook
GPS: 42.238395N  8.712836O
Cociña: moderna, actual
Prezo: menú degustación: 39. Carta: sobre 30€
Peche: domingo noite; luns


Translate »