g pousada

O Armando Alves (mediano, 87.5€) do G Pousada, é un menú equilibrado, rexional e portugués, moi variado, perfectamente deseñado e desenvolvido na práctica. Consta de catro pratos e unha sobremesa.

Restaurante G Pousada 1

Despois das oportunas e creo que necesarias presentacións (Excelência trasmontana), hoxe, e sen máis preámbulos, toca entrar de cheo no que foi a nosa cea no restaurante G (Geadas, Gonçalves) da Pousada de Bragança.

Restaurante G Pousada 6   Restaurante G Pousada 9

A experiencia comeza cunha selección de pans variados que acompañan a tres aceites locais de moi diversos aromas, sabores e acidez. Os pans, entre o máis habitual (trigo) ao sorprendente de mazá. Os aceites perfectos para que, profanos coma nós, apreciemos por comparación inmediata as clarísimas diferenzas que hai entre eles.

Restaurante G Pousada 14

Manteiga dos Açores con bolo de pan feito na casa. Manteiga das de antes, potente, con sabor a manteiga, cun xeneroso punto de sal.

Restaurante G Pousada 15

O primeiro dos aperitivos ten a súa xénese nos anos de estudante de António G no Algarve, cando vía os mozos coas súas cestas a vender berlinesas nas praias: Berlinesa de queixo Terrincho. A masa cede un pouco de dozura pero mantén as características orixinais; o recheo pasa de ser a crema pasteleira para se converter nunha saborosa crema de queixo terrincho; como acompañamento, unha lasca de xamón de porco bísaro e, por riba, unhas raiaduras de oliva negra deshidratada.
Un bocadiño perfecto, dos que deixa pegada na memoria.

Restaurante G Pousada 23

Segundo snack: tartaleta recheada de atún marinado e garavanzos; vén presentada nunha caixa pechada con forma de centola. Moi rico; acusado contraste entre o peixe e o garavanzo.

Restaurante G Pousada 30

Terceiro entrante: as fazulas estufadas con espárragos salvaxes salteados. Mantén o nivel das delicatesen anteriores; con moito sabor e todos os contrastes posibles entre os dous produtos principais: a faceira desfaise na boca, os espárragos no punto, al dente, a carne co sabor do mollo, os espárragos mantendo a súa esencia co seu leve toque de amargor. Conxunción máis que interesante.

Restaurante G Pousada 36

O menú propiamente dito comeza cun prato que representa esa tendencia tan actual da mestura mar e monte. Estamos ante o Santiaguinho, trigo, salpicão de porco bísaro e courgette. Brillante. Para min dos momentos máis altos da cea; o millo (que de entrada confundes con arroz) salteado co salpicão, innovador e delicioso; o santiaguiño con ese mollo a base dos seus propios miolos, lembra os tempos de cando o santiaguiño era bastante máis común que agora. Prato redondo.

Restaurante G Pousada 39

Segundo momento do menú: o Pargo, bivalves e milhos. Sabor a puro mar. Para Carmen, máis de peixe, mellor que para min, que non son moito de bivalves. En todo caso é gusto persoal, porque a execución de cada compoñente do prato é perfecta. A escuma da auga de cocer os bivalvos introduce na boca toda a intensidade da auga de mar, e a crema de millo do fondo suaviza a contundencia de todos os sabores do prato.

Restaurante G Pousada 50

O apartado das carnes comeza cunha que, seica, é un dos buques insignia da casa: o Ossobuco e cogumelos de temporada. A esencia do prato está na carne da perna da vaca esfiañada e perfectamente traballada; o fondo do prato vén ‘pintado’ co miolo do óso. Para min, que non para Carmen, outro dos momentos álxidos da cea. Pese a ser carne, non moi forte, delicado, perfectamente acompañado de cantarelus, un espárrago verde e unha mini cenoria.

Restaurante G Pousada 55

E a traca final dentro dos salgados, o prato máis xenuinamente trasmontano: o Pombo estufado à bragançana. O pombo preséntase en dúas preparacións diferentes: o peito pasado pola brasa, ben marcado no exterior e puro zume por dentro; logo unha pata que chega estufada xunto con patacas, cogumelos e verduriñas e que se presenta na mesa envolta no que semella ser o resultado dunha preparación á papillote. En todo caso, boísimo; non sei se votar polo estufado ou pola peituga ao natural.

Restaurante G Pousada 61

O primeiro momento doce, como os aperitivos, está fóra de carta e chega a nós como pre-sobremesa: un biscoito con granizada de lima e laranxa. Perfecto para romper co ritmo das carnes e refrescar e prepara as bocas, xa no límite da saturación, para o que é a sobremesa propiamente dita.

Restaurante G Pousada 73

De sobremesa, a mencionada en Excelência tramontana pola súa xénese: Beterraba, lavanda e queijo; ou sexa, remolacha, remolacha e remolacha: remolacha en tres texturas diferentes, coa súa crema de lavanda e o xeado de crema de queixo.
Quen ía pensar nun doce, nunha sobremesa centrada na remolacha? Pois Óscar e António Geada. Simplemente espectacular.

Restaurante G Pousada 77
O café vén cunha deliciosa trufa.

Que engadir ao visto e escrito con anterioridade? (Ver Excelência tramontana)
Pois simplemente que malia barbaridade de diñeiro que son 90 euros por persoa, o disfrute da cea (e as lembranzas, as evocacións que deixa…, e como diría o meu irmán, …e o que dá despois para falar!) compensaron con creces o prezo que pagamos.

G Pousada
Óscar Gonçalves

Posada de São Bartolomeu
Rua Estrada do turismo
5300 – 271 Bragança
351 273 331 493
Web
Facebook
GPS: 41.802732N,  6.754143O
Cociña: de autor
Prezo: menú: 65, 87.5 ou 150€
Horario: funciona só para ceas
Mesa Marcada Ranking 2018: posto 28 (18 votantes, 83 puntos)
Michelín: 1 estrela
Guía Boa Cama, Boa mesa: Garfo de ouro


Translate »