Casa Paco, en Torroña (Santa María de Oia) é unha casa de comidas tradicional. Cociña caseira de alta cualidade, trato extraordinariamente amable e prezos que raian no ridículo. Grandísimo descubrimento.
Por Torroña non se pasa, hai que ir.
Pero a excursión en si mesma xa é unha festa. Falo da estrada que, saíndo de Baiona pola Virxe da Rocha, nos leva ata O Rosal atravesando os altos da serra da Grova e localidades esquecidas do mundo como a propia Torroña, Burgueira, Refoxos ou Loureza.
Estamos ante un dos derradeiros redutos desa gandería extensiva outrora parte fundamental da economía da Galiza. A estrada EP-2202 (Baiona-Loureza) é o Paraíso de cabalos, vacas e ovellas que viven en total liberdade polo monte. Ceibes no monte.
Os montes que pechan o Val Miñor concentran seis dos poucos curros que quedan en Galicia. Por unha banda está a Grova (sur e oeste do val) cos curros de San Cibrán, Torroña, Valga e Mougás; polo este temos a serra do Galiñeiro e o Aloia, cos curros de Morgadáns e Vincios.
Ademais, e por se non resulta suficiente, hai puntos (O Cortelliño) con panorámicas tan extensas e espectaculares que competirían máis que dignamente nun concurso polas mellores vistas do mundo.
Casa Paco ten dúas zonas ben diferenciadas. A de entrada, coa barra e a feitura do bar de toda a vida, e o comedor do fondo que, sen renunciar á súa autenticidade, resulta algo máis coidado coa súa peculiar mestura de pedra e madeira.
Sábado de setembro, dúas menos cuarto do mediodía, e xa non hai lugares no comedor máis coqueto (completamente reservado); temos que conformarnos coa zona de fóra, un puntiño máis fría e amorfa, e que acabará, tamén, sen unha mesa libre.
A carta… En realidade non existe tal carta. Estamos ante o típico local no que o camareiro (neste caso sorrinte camareira) le a oferta do día dun pequeno caderno esborranchado de principio a fin. De entrante sopa, caldo, empanada, mexillóns con setas ao allo, mexillóns con fabas…; de prato principal, cocido, cordeiro, rabo estufado, poldro, filete de croca, etc.
Pedimos dous primeiros e un segundo para compartir (alguén nos soprou que aquí as racións, como a cociña e o trato, son familiares).
A empanada, de marisco, das boas… Non, das moi boas.
Masa mestura de millo e trigo inexplicablemente fina, zumenta pero en absoluto graxenta ; compango saborosísimo, no seu punto, sen unha pizca de exceso de aceite, a cebola está pero non se nota… Unha festa.
As anchoas con focaccia (‘fogaza’) unha auténtica sorpresa para un local destas características. A focaccia (negra!!!) con sementes, algunha herba, tomate seco e oliva é unha delicia que se complementa á perfección coa forza das anchoas.
E creo que xa non me quedan palabras para o cordeiro… E iso que é o que máis as merecería…
Como vedes, tiña razón a nosa informadora: estamos ante unha ración con catro anacos de carne e ben provista de abundantes pataquiñas, zanahoria, pemento e cebola: suficiente para comedores medios coma nós (ante os piropos que lle dedicamos ofrécennos repetir). Simplemente extraordinario.
As sobremesas, sen estar ao nivel excepcional do resto da cociña, manteñen decentemente o tipo.
Bebemos o tinto Mencía da casa (este si, prescindible) e un auga e pagamos 18€ cada un. Creo que non se pode pedir máis. Quedamos en volver en breve para o menú de caldo (ou sopa) e cocido (disque é fóra de serie).
Casa Paco ten sona polos seus percebes (por encargo) e ofrece un menú de degustación de 25€: paté con pementos confeitados, empanada, mexillóns con setas ao allo, lagostinos asados, rabo poldro e cordeiro estufados, sorbete de limón, piña flambeada, filloas con nata e café (bebidas incluídas).
Tralo visto hoxe, non sei como podería quedar despois deste banquete anunciado no menú…
Casa Paco
Torroña 14
36779 Sta. María de Oia (Pontevedra)
986 362 171 – 610 453 347
GPS: 42.028745N, 8.836072O
Cociña: tradicional, caseira.
Peche: martes.
Prezo: 15-25€