Cufra, en Porto (Boavista), é a típica cervejaria portuguesa: tomando como base a cervexa ben fría e un marisquiño, podes saltar a case que calquera prato por un prezo accesíbel.
Segundo a nosa benfeitora Galipedia, Cufra fai referencia a unha rexión do sueste de Libia; trátase dunha depresión do deserto na que se concentran os principais oasis do Sahara. O étimo vén do árabe ‘cafir’, palabra utilizada para referirse aos non musulmáns, aos, vulgarmentev ‘infieis’ (literalmente, ‘aqueles que esconden a verdade’).
Cufra, vén, polo tanto, de oasis, de auga e vexetación no medio do deserto, de solaz, de restauración, de cervexa e alimento no medio do asfalto portuense.
Está formado por dous locais. Un, o orixinal, amplo, informal, respondendo á configuración clásica de cervejaria, con barra e moitas mesas, moi próximas, e, moitas delas corridas. O outro espazo é algo máis requintado e agradábel, menos ruidoso. Tocounos neste.
E grazas. Domingo ao mediodía, sobre as dúas menos cuarto, e o local xa está cheo, conseguimos pillar a última mesa. A partir de aí, importantes colas e tempos de espera máis ou menos salientábeis. Tamén hai cola de xente que vén buscar a comida para levar a casa.
Ambiente moi portugués e familiar. Penso que somos a única nota discordante. Predominan as familias e, entre estas, tres ou catro mesas de arredor de vinte persoas.
O servizo, de estilo tradicional nun local coma o Cufra, aberto desde 1974, e sen excesivos espaventos, é dilixente e eficiente sen perder a boa cara.
A carta afronta sobradamente todos e cada un dos cualificativos dos que se gaba o local: cervexería, marisquería, restaurante, bar.
No tocante a mariscos, algúns, só algúns, exemplos: Ameijoas à Bulhão Pato (23.5€), Sapateira (34.90€ o quilogramo), Gambas (56€ o kg.), Lagosta (95€ o kg), ou o Camarão do nosso (110€); neste apartado non poden faltar o arroz ou a açorda de marisco. Tamén atopamos unha Parrilhada à Cufra (60€ persoa).
Xa como restaurante ten entradas (Creme de marisco, 2.6€; Canja de galinha 3.5€, Presunto com broa de Avintes 12€, Chouriço regional na brasa com broa 7.5€, etc.), peixes (Robalinho na brasa 13.5€, Bife de atum de coentrada 12.5€, Bacalhau com natas 14.5€, Feijoada do mar com gambas 20.5€, Filetes de pescada com salada rusa 14.5€, etc; ademais, hoxe, en tempada, Lampreia à bordalesa 26.5€ ou Arroz de lampreia 18.5€; e, sempre, peixes especiais para grelhar, Salmão a 39.5€ o quilogramo, Rodovalho a 55€ o kg ou o Linguado a 66€). No apartado de carnes, tamén moitísimo onde elixir: Bife no grill à pimenta 14.9€, Tripas à moda do Porto 11.5€, Javali estufado com cogumelos e enchidos 14.9€, Picanha na grelha com mollo de alho 17.9€, Cozido à portuguesa, Lingua estufada com puré e ervilhas, Rojões na caçarola com castanhas e legumes, Costelinhas de javali com piripir, Pica Pau, Costeletas de porco na brasa, etc.
Noutra banda un tanto diferente –e atípica– a carta conta, tamén, cunha oferta vexetariana (Lasanha vegetariana 6.9€ ou Arroz selvagem salteado –ervilhas, soja, abacate, milho, cenoura, noz, courgette, rúcula…- 13.9€).
Baixo ese horríbel nome de Snack-Bar, seica destacan as francesinhas, consideradas por moitos como as mellores de Porto. Está a especial (fiambre, mortadela, afiambrado, salsicha fresca, linguiça fresca, lombo assado e queijo gratinado, por 9.5€), a bautizada como Francesinha real à Cufra (fiambre, mortadela, afiambrado, salsicha fresca, linguiça fresca, bife, bacon, queijo gratinado e 4 camarões grandes, 19.5€), ou a Francesinha com bacon em pão de cruz (fiambre, mortadela, filete afiambrado, salsicha fresca, linguiça fresca, bife picado, bacon, queijo gratinado e ovo, 13.5€).
Ademais das francesinhas, unha boa selección de sandes variadas: Cachorro normal, com fiambre, 3.1€, Tosta mista 4.5€, Prego em pão com queijo gratinado e molho 7.6€, Prego em pão com fiambre 5.2€, Hamburguers, etc.).
E, por se non é suficiente, apartados especiais para as omeletas e as saladas.
En fin, malia o mareante da oferta, témolo bastante claro e pedimos o caldo verde (2.3€) e o Cabrito assado com arroz de forno (a dose completa, ración para dúas persoas, 26.5€, e a meia dose, ou ración individual, 23.5€).
Típica comida de domingo portugués. Perfecta. Tanto o caldo coma o cabrito, elaborados de xeito tradicional, moi saborosos, ricos, con aire a pobo, de auténtica festa. O cabrito vén cunhas pataquiñas excepcionais, un arroz de forno con miúdos moi, moi rico, e unha crema de legumes que non nos gustou tanto.
Entre o Pastel de nata, o Leite creme, a Tarte de maracujá, o sublime de laranja, o Semi frio de bolacha e café, os Profiteroles 3 chocolates, etc., compartimos unha Torta divina (folhado de framboesa); para non romper a tendencia, tamén tipicamente portuguesa: moi, moi doce, raiando (se non pasa) o límite do exceso de empachoso.
Bebemos auga e viño Meia Encosta (Tinto Dão 2017, rico en boca, aromático, intenso, meloso, persistente; moi boa elección para os 5.70€ que custa esta garrafa pequena). Co café pagamos 21€ por cabeza. Pareceume un prezo máis que razoábel.
Coñecemos o Cufra hai vinte anos, alá polo dous mil, cando aínda se pagaba en escudos. Había tempo que non iamos e a valoración segue a ser exactamente a mesma: nunca defrauda e mantén os prezos bastante axustados.
Seica o tempo non pasa para este oasis no Porto.
A saída foi para coñecer a nova Terminal de Cruceiros de Porto (Matosinhos), que só abre os domingos pola mañá e para visitas guiadas.
O proxecto do arquitecto Luis Pedro Silva (ex-alumno e agora profesor da Escola de Porto) en pouco tempo converteuse nunha escala obrigatoria nas numerosas xiras que se organizan pola arquitectura moderna da cidade.
Gustoume. A visita guiada paga a pena. Ademais de percorrer espazos non abertos ao público, as explicacións do guía son magníficas e axudan a coñecer un edificio que, no seu diálogo permanente co mar, en moitos casos non precisa de explicacións.
Visitas: domingo pola mañá; saídas ás 10.15, 11.15 e 12.15 horas; duración aproximada unha hora; billete normal, 5€.
Cervejaria Cufra
Avenida da Boavista 2504
4100-119, Porto
351 22 617 2715
GPS: 41.162045N, 8.652921O
cufra.pt
Facebook
Cociña: tradicional
Prezo: desde 10 a 100€
Peche: luns