casa salvador, o templo do bacallau

Casa Salvador, o templo do bacallau, está na Baña e vai para os 100 anos importando e cociñando bacallau de Islandia. Casa de comidas de sempre cunha magnífica relación calidade-solera-prezo.

Casa Salvador 01 Casa Salvador 05

O local é clásico, o comedor de toda a vida, sinxelo, sen excesos, sen estridencias, diáfano, moi luminoso e agradable. Servizo amable, atento e rápido.
A carta é ampla e mantén o clasicismo xeral da casa: croquetas (7€), gambas á prancha (12€), espárragos da Rioxa extra (6€), ensalada… Filete de croca (11€), estrecosto (13€), costeleta de tenreira (13€)…
Pero aquí quen manda é o bacallau: en empanada para abrir boca (6,60€), ao forno e á galega (18€). Ao forno hai que encargalo con tempo pois quere hora e media de lume de leña; vén cun sofrito de cebola, pemento vermello, tomate e pemento doce, e acompañado de pataca cocida; desalgado no seu punto, está para repetir.
Leo por aí que outra das estrelas da casa son os riles ao xerez, así que, como bo afecionado que son, e ante a escaseza de prato tan exquisito nas mesas modernas, pido para probar: están, se cabe, aínda mellores que o bacallau.
Carmen é de empanadas e tampouco sae decepcionada; como vedes, masa moi finiña e unha boa altura de compango de bacallau con pasas. Moi rica.

Casa Salvador 08Casa Salvador 09
Casa Salvador 11Casa Salvador 12
Casa Salvador 13Casa Salvador 14

Boa selección de sobremesas caseiras; desde o arroz con leite (3,60€) ao queixo de Arzúa con marmelo da casa (4,5€), pasando por variedade de tortas. Tiramos pola de iogur con froitos do bosque e pola de café con augardente branca; esta, en especial, pon broche de ouro á comida.

Unha de empanada, unha de riles, unha de bacallau ao forno (que conta coma unha e media), coas dúas sobremesas, auga e unha xerra de viño ribeiro da casa pagamos 22€ por cabeza.
Non está nada mal. Moi boa comida clásica para un prezo que anima a repetir calquera venres de vixilia.

Casa Salvador
Mercedes García Barreiro

Seoane 23, Barcala
15837 A Baña
(Estrada Santiago-Muxía)
981 885 312
GPS: 42.932055N, 8.767043O
Cociña: Tradicional
Peche: Luns
Prezo: 20-25€


Translate »