a parada das bestas

Estaba no punto de mira desde hai bastante tempo, e tivo que ser agora, na última etapa do Camiño, que coñecemos esta Parada das Bestas da que tiñamos refencias mesmo desde a súa xénese.

Restaurante Parada das Bestas 348

Porque María, xunto con Suso, almas mater da Parada das Bestas, é irmá de Ana, e Ana e mais o seu home, Pablo, foron bos compañeiros nosos (dos dous, en diferentes momentos) no cole de Vincios.

Restaurante Parada das Bestas 349     Restaurante Parada das Bestas 350

Sobre a base dunha antiga casa de labranza do século XVIII, con todos os seus anexos, pallar, tendal do forno, hórreo, tulla…, María e Suso levantaron unha sobresaínte casa rural na que, ademais, dan marabillosamente de comer.

Restaurante Parada das Bestas 353     Restaurante Parada das Bestas 355

Todo, interiores e exteriores, respectan ao máximo o contorno rural no que está a casa. Así, o comedor, é todo pedra e madeira, desde a cheminea, nun curruncho, ata as madeiras do entramado do teito visto.
Clásico, tradicional, rural… que non trapalleiro, que en cada detalle podes sentir o meco e o coidado que conduciu a ese detalle concreto e non outro. Comedor moi luminoso, confortable, de medidas equilibradas, arredor de dez mesas para non máis de 40-50 comensais.

Restaurante Parada das Bestas 358     Restaurante Parada das Bestas 012

Carta baseada en produtos de primeira cualidade elaborados respectando as normas e receitas da cociña tradicional pero, en moitos casos, con sorprendentes toques creativos. O resultado é excepcional.

Restaurante Parada das Bestas 005

Entrantes –Saquiños de cabaciña e maionesa de millo ou Tosta de pemento asado, berenxena, trigueiros, vinagreta de tomate e queixo de Arzúa– orixinais e divertidos adoptando un certo grado de risco.
Pratos nunha liña máis tradicional, sen outra sorpresa que non sexa o propio resultado final –entrecosto, solombo, capón estilo peregrino, paletilla de año asada ou bacoriño ao forno–.

Restaurante Parada das Bestas 015     Restaurante Parada das Bestas 014

Empezamos coa delicadeza da cociñeira, un bocado a base de capas de pemento alternadas con, creo lembrar, bacallau.

Restaurante Parada das Bestas 017     Restaurante Parada das Bestas 018

Para as entradas, Carmen pide unha que, polo que leo, estase a converter en bandeira da casa: o Follado de verduras con queixo de Ulloa. Despois de probalo confírmase coma un prato realmente especial. Suave e moi saboroso.
Pola miña conta arrisco ao máximo e pido o Touciño confitado, gambas e toque cítrico. Para evitar sorpresas –seica houbo algún problemiña– son avisado de que se trata exactamente do que anuncia a sona: un taco de touciño.
Excepcional. Un deses bocados que enche a boca e deixa pegada por moito tempo. Conxunción perfecta de corte e mar. A visita paga a pena só por este prato.

Restaurante Parada das Bestas 021     Restaurante Parada das Bestas 023

Carmen, Bonito do Norte con tomate confitado e trigueiros, e eu Bacallau con crema suave de allo e grelos. Os dous boísimos pero, sen desprezar, quedo co meu, unha reinterpretación do bacallau con allada que, coa cualidade excepcional do bacallau e o acompañamento dos grelos, resulta perfecto.

Restaurante Parada das Bestas 024

De sobremesa, unhas Peras bébedas con xelado que manteñen o nivel da comida, unha mestura de sabores, texturas e temperaturas que sitúa o listón altísimo.
Despois de tanto día seguido de papatoria unha tras outra, Carmen non ten demasiado bo corpo e renuncia á sobremesa.
Ademais, esta circunstancia sérvenos de desculpa para volver a esta Parada das Bestas os dous en plena forma.

Restaurante Parada das Bestas 016 Restaurante Parada das Bestas 019 Restaurante Parada das Bestas 020 Restaurante Parada das Bestas 022

Xa que estamos en carretera conformámonos con beber auga. Pagamos 60€ que, globalmente (local, atención, produto, elaboración…), nos parece un prezo moi axustado.
Sen paixón subxectiva, e sen ningún tipo de dúbidas, un local ao que regresar.

A Parada das Bestas
María Varela 
Santa María de Pidre 27
27207 Palas de Rei
Teléfono: 982 183 614  /  689 119 521
Fax: 982 163 926
E-Electrónico
Web
GPS: 42º49’46.50”N  07º55’21”W
Localización en Mapas de Google

PD: Xa que no seu momento mencionaba o paso de Gwyneth Paltrow por Casa Pintos, en Cambados, e como xa logo de regreso en Hollywood daba a receita dos Berberechos ao albariño, xusto é dicir que A Parada das Bestas foi unha das bases para a grabación dedicada a Galicia do programa On de Road Again con Gwyneth de condutora. En YouTube podemos ver como colabora con María Varela na preparación dun capón.